Американскиот претседател Доналд Трамп го објави својот нов план за воведување царини на сите производи што се увезуваат во САД. Држејќи голема табела со наслов „Реципрочни тарифи“, тој ги претстави новите трговски мерки што ќе ги воведе неговата администрација против одредени земји, како и царините што тие веќе ѝ ги наметнуваат на Америка, пренесе „Си-ен-ен“. Според новите царински стапки, увозот од Обединетото Кралство ќе биде оданочен со 10%, додека Европската унија ќе се соочи со 20% царина. – Тие ни наплаќаат, ние им наплаќаме. Кој може да се лути? – изјави Трамп, предизвикувајќи бурна реакција од публиката. Тој посебно ги издвои Кина и Европската унија, велејќи дека тие „ја искористуваат Америка“: – Не тепаат, жално е да се гледа. Мизерно е! – – рече Трамп. Осврнувајќи се на Индија, тој додаде: „Многу тешко. Многу, многу тешко“. „Трговскиот дефицит е вонредна состојба!“ Трамп оцени дека трговскиот дефицит на САД е „национална вонредна состојба“ која ја загрозува безбедноста и економската стабилност на земјата. – Американските компании веќе не произведуваат доволно антибиотици. Скоро целата електроника – компјутери, телефони, телевизори – ја увезуваме од странство – нагласи тој. Како пример ја спомена и бродоградбата, посочувајќи дека едно кинеско бродоградилиште произведува повеќе бродови годишно од сите американски бродоградилишта заедно. – Затоа од утре започнуваме со примена на реципроцитетни тарифи кон другите земји! – најави Трамп. Според него, Америка веќе нема да толерира трговски нерамнотежи: „Ни зедоа толку многу богатство. Веќе нема да дозволиме!“ „Време е да се грижиме за Американците!“ Тој истакна дека САД повеќе не можат да си дозволат да субвенционираат други економии: „Ние се грижиме за земјите ширум светот. Време е да почнеме да се грижиме за сопствениот народ!“ За време на говорот, Трамп покани еден од присутните поддржувачи, кого го ослови како Брајан, да се обрати пред толпата. Брајан, облечен во флуоресцентен елек, рече дека работи во автомобилската индустрија во Мичиген и сведочел како фабриките низ Детроит со децении се затворале, додека работните места ја напуштале Америка. – Политиката на Доналд Трамп ќе ги врати инвестициите и ќе отвори нови фабрики! – рече тој, додавајќи дека многу синдикални работници го поддржуваат претседателот. – Едвај чекам да видам што носи иднината за нас! – заклучи Брајан.