ជាថ្មីម្តងទៀត ប្រទេសហុងគ្រី បានចេញការព្រមានចំៗថា ការទទួលយកទីក្រុងកៀវ ចូលជាសមាជិករបស់សហភាពអឺរ៉ុប (EU) មានតែធ្វើឲ្យជម្លោះរុស្ស៊ី-អ៊ុយក្រែនកាន់តែអូសបន្លាយពេលប៉ុណ្ណោះ ហើយអ្វីដែលធ្ងន់ធ្ងរជាងនេះទៀតនោះគឺថា វានឹងបង្កហានិភ័យអូសទាញប្លុកនេះ ឲ្យធ្លាក់ចូលទៅក្នុងភ្លើងសង្គ្រាមដែរ ជាក់ជាមិនខាន។ តាមការចុះផ្សាយរបស់ RT កាលពីថ្ងៃចន្ទទី១២ខែឧសភាឆ្នាំ២០២៥, នាយករដ្ឋមន្ត្រីហុងគ្រី Viktor Orban បានប្រាប់ទៅសន្និសីទប្រធានសភា EU ក្នុងទីក្រុងប៊ុយដាប៉ែស ថា «ហុងគ្រីសូមប្រឆាំងយ៉ាងដាច់អហង្ការចំពោះសមាជិកភាពរបស់អ៊ុយក្រែនក្នុង EU។ ក្នុងនាមជាអ្នកជិតខាងអ៊ុយក្រែន យើងជឿថា បើអ៊ុយក្រែនចូល EU បានមែន នោះមានន័យស្មើនឹងសង្គ្រាមហើយ។ យល់ល្អ EU កុំទទួលយកប្រទេសដែលកំពុងមានសង្គ្រាមអី»។ នេះមិនមែនជាលើកដំបូងឡើយដែលហុងគ្រី ប្រកាន់ជំហរម៉ឺងម៉ាត់ប្រឆាំងសមាជិកភាពរបស់អ៊ុយក្រែនក្នុង EU។ រម្លឹកទៅឆ្នាំ២០២៣ កាលនោះ រដ្ឋមន្ត្រីការបរទេសហុងគ្រី Peter Szijjarto ក៏ជំទា​ស់ដែរថា វាមិនមែនជារឿងត្រឹមត្រូវទេសម្រាប់ EU ក្នុងការពិចារណាចំពោះសមាជិកភាពអ៊ុយក្រែន។ លោកអះអាងថា តាមរយៈការទទួលស្គាល់ទីក្រុងកៀវ, EU ក៏នឹងមានសង្រ្គាមដែរ។ ច្បាស់ណាស់គ្មាននរណាម្នាក់ ចង់ឲ្យរឿងនេះកើតឡើងឡើយ! ​ការពង្រីកសមាជិក ​គួរតែ​បម្រើ​ដើម្បី​ផ្សព្វផ្សាយ​សន្តិភាព មិនមែន​នាំ​សង្គ្រាម​ចូល EU ​ទេ​។ សូមជម្រាបថា សមាជិកភាព EU នេះហើយគឺជាគោលដៅធំមួយរបស់អ៊ុយក្រែន ដោយទីក្រុងកៀវបានដាក់ពាក្យសុំចូលជាផ្លូវការក្នុងខែកុម្ភៈឆ្នាំ២០២២ ក្រោយផ្ទុះជម្លោះជាមួយរុស្ស៊ីបានប៉ុន្មានថ្ងៃប៉ុណ្ណោះ។ ទោះបីជាយ៉ាងណាក៏ដោយ គោលបំណងរបស់អ៊ុយក្រែន មិនបានសម្រេចឡើយ ព្រោះមានការប្រឆាំងពីសំណាក់សមាជិកមួយចំនួនជាពិសេសហុងគ្រីនេះតែម្តង៕ អត្ថបទ៖ សុខ សុវណ្ណ ចុចអាន៖ ហុងគ្រី ថា អ៊ុយក្រែន នឹងនាំសង្គ្រាមមក អឺរ៉ុប